Tau ianfach mögelkhaiden, hü dü üs halep könst

Dü könst din auersaatingen nü spende. Mä bluat een fangertip/klik üüb det fial oner de auersaatingstekst könst dü tusteme, dat din auersaatingen saamelt, ufseekert an onerschükt wurd mut. So loong üüs det ütjweelet as, wurd din auersaatingen spendet – an dü täärst di am niks widjer komre.

At as uk mögelk, dat dü din auersaatingen bewäärtest an komentiarest. För det funktiuun skääl dü di iansis för en user account registriare. Wan dü ens uunmääldet beest, könst dü de Feedback Modus brük. Uun det liist mä din tuföör maaget auersaatingen könst dü en auersaating ütjweel an feedback du. Diar könst dü det auersaating bewäärte (gud, ferkiard, nüürig) an en komentar of ferbeedring ufstjüür. Det as fööraal toocht för lidj, wat fering snaake an tutmanst 16 juar ual san.

Heest noch fraagen?

Fein! Do leet’s man began: huaram maage wi det?

A Auersaater as faan üs so apbaut, dat wi det, wat dü auersaatst, normaalerwiis ei onerschük. Oober mä üüs Auersaater-projekt wel’f nooch erforske, hü gud maskiin-auersaatingen för fering loke an hü det uunnimen wurt. Diarauer haa wi mä Dootenspende an Feedback Modus en freiwalig mögelkhaid skaafet, diarmä lidj mä hör auersaatingen gans ianfach dooten för üs forsking bidreeg kön. Diartu fu wi so uk noch nei dooten tup, wat wi brük kön, am a Auersaater tu ferbeedrin. Tutmanst as det ian faan üüs ideen, det tu ferschüken an tu onerschüken.

Wat för persöönelk dooten wurd diarbi ferwerket?

Gans algemian wurd persöönelk dooten, wat dü salew uun en auersaating uunjafst (en nööm tu’n bispal), bi en dootenspende of uun en feedback ufseekert. Wan wi dön dooten onerschük, anre wi sok persöönelk informatiuunen oober iarst ens, iar diarmä widjer werket wurt. Öler dooten, sowat üüs IP-adres an user profil, wurd ei diarmä ufseekert.

Bi en Dootenspende wurd bluat din auersaating (det, wat dü iinden heest an det, wat a Auersaater ütjden hee) an hög technisch informatiuunen (hün spriiken auersaat wurd, hüföl tiaken de tekst hee, hü loong de server för’t auersaaten brükt, dootem faan’t auersaating) ufseekert.

För de Feedback Modus jaft at det mögelkhaid, freiwalig hög persöönelk informatiuunen am det aanj spriik-biografii uun’t profil uuntudun. Det san informatiuunen, wat üs halep, dön dooten sosiolinguistisk tu onerschüken. Döndiar dooten wurd oober bluat mä en feedback ufseekert, wan en enkelt informatiuun ei mä din persuun tup broocht wurd kön. So haa wi det mögelkhaid, sosiodemograafisk informatiuunen tu fun, widjert dü pseudonüüm blafst. Dü könst dön informatiuunen uun din profil tu arke tidj salew anre (of lösche).

En bispal, hü wi diarüüb aachte, dat dü pseudonüüm blafst

Uun detheer bispal wääl dü hal feedback tu en auersaating ufdu. Uun din profil heest dü uunden, dat dü fering onerracht uun’t huuger skuul besoocht heest. Wan dü din feedback nü ufstjüürst, wurt diarmä det informatiuun ufseekert, dat at faan hoker komt, wat fering onerracht uun’t huuger skuul besoocht hee. Det pasiaret oober bluat dan, wan at tutmanst ian öler registriaret persuun jaft, huar det salew informatiuun bi tu finjen as. Wan’t det ei jaft, wurt det feedback saner det info am fering onerracht ufseekert.

Wat mä din feedback tup ufseekert wurt, könst dü imer sä, iar dü en feedback ufstjüürst. Troch det wiis, hü informatiuunen iinbünjen wurd, kön’t uk wees, dat tu onerskiaselk tidjen muar of maner informatiuunen mä ufseekert wurd. Det hinget diarfaan uf, wat öler usern för infos uunjiiw.

Kön ik dootenspenden of feedbacks turagtji?

At as ei mögelk, dootenspenden an feedbacks salew weler turagtutjin, auer jo ei mä persuunen of user accounts ferbünjen san an auer det at ünmögelk maage wul, mä dön dooten rocht tu forskin.

Dü könst oober tu arke tidj det Dootenspende weler ufstel of pausiire (wan dü det funktiuun weler ufweelest) of din feedback profil anre of sogoor gans lösche.

Huaram skal ik för de Feedback Modus 16 juar ual wees?

Auer at det mögelkhaid jaft, üs sosio-demograafisk informatiuunen för üüs forskingsdooten tu auerdun, skel’f seekergung, dat lidj, wat det funktiuun brük, tutmanst 16 juar ual san. Det hinget mä gesetsen am’t dootenschuts tup.

Auersicht: wat föör dooten wurd mä en dootenspende of en feedback ufstjüürd an ufseekert?

Data	Donation	Feedback
tekst faan’t auersaating	jä	jä
technisk informatiuun am’t auersaating	jä	jä
feedback	naan	jä
IP-adres, user-nööm, e-mail-adres	naan	naan
äälerns-skööl	naan	*
sant wan dü fering snaakest	naan	*
of dü fering onerracht/kursen besoocht heest	naan	*
hüfölse dü fering snaakest	naan	*

* = det informatiuun as freiwalig an det informatiuun wurt bluat ferwerket, wan dü ens tustemet heest an at tutmanst 1 öler registriaret persuun jaft, wat det uk uunden hee.

Ale dooten wurd bluat för’t forsking brükt an ei mä öler dooten faan üüs websidj tupbroocht.

Ale informatiuunen tu dön teemen fanst dü uk uun üüs dootenschutsferklaaring.

Betingen för de gebrük

De gebrük faan dön funktiuunen Dootenspende an Feedback Modus as folstendig freiwalig an bluat mögelk, wan dön funktiuunen tuföör tustemet wurden as. Mä dön funktiuunen wurd auersaatingen, wat faan üüs server uunfraaget wurden san, tup mä det uunfraag an widjer informatiuunen, üüs üüb detheer sidj (sä boowen) an uun a dootenschutsferklaaring beskrewen, ufseekert an ferwerket. Mä’t tusteming tu det ferwerking faan a dooten wurd a dooten a Ferring Stiftung amsonst för’t forsking auerleet. A dooten kön ei turagtaanjen wurd. A Ferring Stifting mut salew diarauer enskias, a dooten öler forskern widjertudun.